በሀገራዊ ምክክሮች ሂደት ውስጥ የሴቶችን አጀንዳዎች ማካተት የሀገርን የወደፊት ዕጣ ፈንታ በመቅረፅ ረገድ ወሳኝነት አለው

በኢትዮጵያ ሴቶች ከጠቅላላው ሕዝብ ከግማሽ በላይ የሆነውን ድርሻ ይይዛሉ፤ ነገር ግን በውሳኔ አሰጣጥ ሂደት ውስጥ ያላቸው ውክልና ዝቅተኛ ነው። አጀንዳዎቻቸውን ማካተት ጨምሮ ሴቶች ድምፃቸው እንዲሰማ እና አመለካከታቸው ግምት ውስጥ እንዲገባ ማድረግ በሀገር ደረጃ ፍትሐዊ አስተዳደር እንዲኖር ያስችላል።

ብዙ ጊዜ ሴቶች ጾታን መሠረት ያደረጉ ጥቃቶች፣ እኩል ያልሆነ የትምህርት እና የጤና አገልግሎት አቅርቦት እንዲሁም የኢኮኖሚ ተሳትፎ ማነቆዎችን የመሳሰሉ ልዩ፣ ልዩ ተግዳሮቶች ያጋጥሟቸዋል። በሀገራዊ ምክክር ሂደት ውስጥ የሴቶችን አጀንዳዎች ማካተት እነዚህ ችግሮች ተለይተው እንዲፈቱ እና መፍትሔዎች እንዲዘጋጁ ያስችላል።

የሴቶች አጀንዳዎች ሁሉንም የኅብረተሰብ ክፍል የሚነኩ እና የሀገርን የወደፊት ዕጣ ፈንታ የሚቀርፁ ናቸው። የሴቶችን አጀንዳ አለማካተት ማለት ጉልህ የሆነ የኅብረተሰብ ክፍል ያለውን አመለካከት እና ፍላጎት ችላ ማለት ነው። ይህም ሁሉን አቀፍ ፖሊሲዎች እና ውጥኖች እንዳይፈጠሩ እንቅፋት ይሆናል።

ሀገራዊ ምክክርን ጨምሮ ሴቶችን ከግጭት በኋላ በሚከናወን የሽግግር ፍትሕ ውስጥ ማካተት ለዘላቂ ሰላም እና መረጋጋት አስተዋጽኦ ያደርጋል። ምክንያቱም ብዙውን ጊዜ ሴቶች በሰላም ግንባታ ጥረቶች ውስጥ ግንባር ቀደም ተዋናይ ናቸው፤ በዚህም የተነሣ ስለ እርቅ እና የማኅበረሰብ ፈውስ ልዩ ግንዛቤዎችን መስጠት ይችላሉ።

በአንድ ኅብረተሰብ መካከል ሀገራዊ ምክክሮችን ማድረግ ሕጋዊ እና ተቋማዊ ማሻሻያ ለማድረግ በር ይከፍታል፤ እነዚህ ማሻሻያዎች ደግሞ የጾታ እኩልነትን ከግምት ውስጥ በማስገባት የሴቶችን መብት የሚያስጠብቁ ሕጎች እና ፖሊሲዎችን የሚያራምዱ መሆናቸውን ማረጋገጥ ይገባል።

ኢትዮጵያ የሥርዓተ ጾታ እኩልነትንና የሴቶችን መብት የሚደግፉ ዓለም አቀፍ ስምምነቶች ፈራሚ ሀገር ነች። ስለሆነም ሀገራዊ ምክክር ሂደት ውስጥ የሴቶችን አጀንዳ ማካተት ሀገሪቱ በዓለም አቀፍ ማኅበረሰብ ዘንድ ያላትን ደረጃ ከፍ ያደርጋል።

በአጠቃላይ የሴቶችን አጀንዳዎች በሀገራዊ ውይይቶች ውስጥ ማካተት ፍትሐዊነት ብቻ ሳይሆን የተለያዩ አመለካከቶችንና የሀገሪቷን የወደፊት ዕጣ ፈንታ በመቅረፅ ረገድ የኅብረተሰቡን ሙሉ አቅም መጠቀም መሆኑ ግንዛቤ ሊወሰድ ይገባል።